ഭൂമിയുടെ ഉപഗ്രഹമായ ചന്ദ്രന് ഭൂമിയെച്ചുറ്റി സഞ്ചരിക്കാന്‍ 27 ദിവസങ്ങള്‍ വേണം. പ്രദക്ഷിണ വേളയില്‍ ഭൂമിക്കു ചുറ്റുമുള്ള 12 രാശികളിലൂടെയും അവയിലെ 27 നക്ഷത്രങ്ങളിലൂടെയും ചന്ദ്രന് കടന്നു പോകുന്നു. ഈ നക്ഷത്രങ്ങള്‍ ചന്ദ്രന്‍റെ ഭാര്യമാരാണെന്നാണ് പൌരാണിക സങ്കല്‍പ്പം. ഓരോ നക്ഷത്രത്തിലും ചന്ദ്രന് നില്‍ക്കുന്നത് ഏകദേശം 2.25 ദിവസമാണ്.
ഏത് നക്ഷത്രത്തിലാണോ ഒരാള്‍ ജനിക്കുന്നത്, അയാള്‍ രൂപം കൊണ്ടും പ്രവൃത്തി കൊണ്ടും സ്വഭാവം കൊണ്ടും ആ നക്ഷത്രത്തിന്‍റെ പ്രത്യേകതകള്‍ പ്രകടിപ്പിക്കുന്നു എന്ന് പൌരാണിക കാലം മുതല്‍ ജനങ്ങള്‍ വിശ്വസിച്ചിരുന്നു. രാജകുടുംബാംഗങ്ങള്‍ക്ക് നാള്‍ ചേര്‍ത്ത് പേരുനല്‍കുന്നത് ഈ വിശ്വാസത്താലായിരിക്കണം. ചില സ്ഥലങ്ങളിൽ സാധാരണക്കാരും മുന്‍പ് കുട്ടി ജനിക്കുമ്പോള്‍ അന്നത്തെ നക്ഷത്രത്തിന്‍റെ പേരോ ആ നക്ഷത്രത്തിന്‍റെ അധിദേവതയുടെ പേരോ നല്‍കുന്ന പതിവുണ്ടായിരുന്നു. വിവാഹപ്പൊരുത്തത്തില്‍ നക്ഷത്രത്തിന് പ്രാധാന്യമുണ്ടായതും ഇക്കാരണത്താലായിരിക്കും. മനുഷ്യരില്‍ മാത്രമല്ല, ജന്തുക്കളിലും സസ്യങ്ങളിലും നക്ഷത്രങ്ങള്‍ സ്വാധീനം ചെലുത്തുന്നതായി കാണപ്പെടുന്നു. എന്തായാലും ഒരേ നക്ഷത്രത്തില്‍ ജനിക്കുന്ന വിവിധ വ്യക്തികളില്‍ ഒരേ സ്വഭാവഗുണം ഉള്ളതായി വളരെ മുന്‍പുതന്നെ ജ്യോതിഷ വിദഗ്ദ്ധരായ മഹര്‍ഷിമാര്‍ മനസ്സിലാക്കിയിരുന്നു. ശ്രദ്ധിച്ചാല്‍ നമുക്കും ഇത് സത്യമാണെന്ന് ബോധ്യപ്പെടുന്നതാണ്. വിവിധ നക്ഷത്രക്കാരുടെ പ്രത്യേക സ്വഭാവങ്ങള്‍ നമുക്കും നിരീക്ഷിക്കാം.
No comments:
Post a Comment